أحب نفسي ..

أحب نفسي !
كلمه يبدو علي قائلها الغرور ..
ولكن لماذا !!
 أليس كل انسان يحب نفسه و لو بقدر بسيط .. 

لكن قبل كل شئ يجب أسأل من أحب "نفسي" ..
هل أحبك عندما أغش ! فحينها أكون غشيت .. نفسي " أنت" ..
هل أحبك عندما أكذب ! فحينها أكون كذبت على نفسي " أنت " ..
هل أحبك عندما أخذ فرصة من هو أحق مني ! فحينها أكون ظلمت نفسي "أنت" ..
هل أحبك عندما أعصي الله ! فحينها أكون ضللت نفسي "أنت" ..
أرأيت أنا منك وأنت مني .. كيانُ واحد ..
فلماذا توسوسي لي بما يؤيذنا معأ ..
لماذا لا تقفي معي جنباً بجنب ..
أتعلمين !!!
سوف أقاومكـ .. أتجاهلكـ ..
وكيف لا فمعي من هو أقوى منك ..
" أرادتـــــــــــــــــــــــــــــــي "
لقد أعلنت الحرب عليكِ .. لأخر لحظه في حياتي ..
فبارادتي .. سأنتصر عليكـِ دائماً ..  وهذا وعدي لكـِ ..

امضاء المتمرده عليكـِ دائماً ..

كيف تحاكمني على جهلي وأنت لم تعلمني !!

كيف تحاكمني على جهلي وأنت لم تعلمني !!
كيف تتركني لمن هو أجهل مني ليعلمني ما يريد  .. لا ما أحتاج !!
كيف تتهمني باللامبالاه وأنت من وجهني اليه !!
كيف أعلنت علي الحرب ولم تجهزني حتى لأدافع عن نفسي بالقليل !!
فطرتي سليمه لكنها فقيره ..
نعم لقد اخطأت في حق نفسي !!
جنيت عليها .. لأني بشر .. اخطأ .. بل يجب أن أخطأ ..
كل البشر يخطئون .. حتي أنت يا عالم تخطأ ..
فقط ساعدني .. أعطني مما أعطاك الله ..
لا أطلب مالك .. لكن أريد علمك ..
أريد الكرامه .. الأنسانيه ..
هل تعتقد أني سعيدة هكذا !!
قد أكون نهمت للمال في البدايه .. لكن الان قد أعطي كل ما أملك ..
فقط لأستعيد ما افقدته لنفسي لحظة ضعفي ..
اذا رأيت مني خطأ انصحني .. أليس الدين النصحيه !!
لماذا لا تأتي الي و تمسك بيدي للنجاه ..
قد يبعدني شيطاني عن طريقك ..
ولكن ايمانك سيوجهك الي .. بل يجب أن يوجهك ..
سأرشدك أنا !!
أبحث عني . وعندما تجدني ..
حدثني عن حقوقي .. كرامتي ..
حدثني باللين والرفق والحب والاهتمام ..
قل لي أني مهمه ,غاليه , عزيزه .. أميره ..
حدثني مراراً .. لا تيأس لكي لا يموت قلبي ..
و عندما تنجح .. لي عندك رجاء قبل أن ترحل ..
لي مثيلات لم يولدن بعد , أو موجودات فعلأ لكنهن لم يعرفن هذا الطريق بعد..
 ربي لهم من يفعلون مثلك .. لكن اجعلهم يدركوهن قبل الخطأ ..
ليجعلوها وقايه .. لا علاج ..

رساله لكل من حمل علم الله ولم ينفع به ..
بل أساء اليه ..

حاليأ بالأسواق .. (1)

مفيش فكره .. مفيش رساله .. مفيش ابداع .. مفيش قصه .. مفيش ذمه .. مفيش فايده ..
فيه مشاهد خارجه .. فيه ألفاظ خارجه .. فيه تفاهه .. فيه أستخفاف بعقول الناس ..
فيه كوميدي مسف .. فيه أكشن أهبل .. فيه رومانسي ممل .. فيه دراما مبالغ فيها ..
أكيد الكلام بقا واضح وأكيد أنا بتكلم عن اللي بقت فيه السنيما المصريه دلوقتي ..
أبا بقالي خمس سنين مش بدخل سنيما .. مش عشان مش بحبها .. بس عشان بعترض ..
بعترض علي أني أضيع وقتي في فيلم مفيهوش فكره ..
بعترض علي أني أتفرج على فيلم مسروق شفته قبل كده .. ميتناسبش مع ثقافتي ..
بعترض على أني أجرح عيني بمناظر خارجه .. أو حتي أسمع الفاظ خارجه ..
بعترض علي أني أدفع فلوس للي بيخربوا قيم مجتمعي ..  عشان يعملوا بيها أفلام من دي تاني وتالت وعاشر ..

بعترض أني حد يعاملني على أني غبيه و مغفله بأقبل أي حاجه تتعرض عليا من غير ما  أقيم أو أناقش ..
عايزه أتفرج مع عيلتي علي فيلم من غير ما اضطرأروح المطبخ وأنا مش عايزه منه حاجه .. 

زمان كانت الأفلام .. مأخوده من روايات طه حسين ونجيب محفوظ وغيرهم  ..
مش بس أدب عربي كمان أدب انجليزي .. بس ده كان زمان ..

أنا بنت مصريه عربيه شرقيه .. ديني و مجتمعي كرموني وحافظوا عليا ..
مش عايزه أشوف أن صوره البنت أنحصرت بس في الاداء بجسمها من غير عقلها ..
مش عايزه أسمع أفيه غير محترم أتقال في فيلم يتقالي أو لغيري في الشارع ..
مش عايزه أشوف أن الدين " مسلم أو مسيحي" بيستهزء بيه ..
مش عايزه أفلام تنشر روح الاحباط بكلام مش في مصلحة حد  ..
عايزه رقابــــــــــــــــــــــــــــــــــــه علي المصنفات الفنيه ..
عايزه صورة بلدي تتحسن .. مش تبقي مصر يعني عشوائيات .. أكيد موجوده بس متبقاش هي الواجهه ..
عايزه اَدميه .. خاطب عقلي مش حاجه تانيه ..

بأقول بأعلى صوتي لا للفن الهابط المسئ لأدميتي , ديني و بلدي ... 

كعب داير ..

" الله يخرب بيت الروتين" ..
الجمله دي قالها حسين أفندي في فيلم " أم العروسه " ..
واللي بيقولها كل يوم .. أي مواطن مصري في أي حته ..
لما تضطره الظروف انه يروح مصلحه حكوميه أو خاصه .. مش فارقه كتير ..
عشان كلمه واحده .. ورق .. ورق .. ورق ..
شهاده ميلادك .. صورتين من بطاقتك ..
فاتوره الكهرباء .. فاتورة الغاز أو الميه .. الخ ..
60 مشوار ف 60 حته .. عشان أختام عليها النسر الله يسامحه ..
وكل ورقه تدفع رسومها و فرده للموظف اللي هيتكرم وهيتعطف ويطلعها ..
وبما ان دلوقتي احنا في عصر كل حاجه فيه بتصغر توفيراً للمساحه والوقت ..
ساعات العمل في أي مصلحه بقت من 11 - 1 الظهر ..
يعني " ضاع العمر يا ولدي " في ورقه في الأخر .. ولا ليها 60 لازمه ..
الكمبيوتر ..
كلمه بدائيه من أيام الطرواديين .. أكيد طبعاً ..
مش بنسمعها غير لما نتكلم عن التسليه .. عايز أشوف فيلم ..
اسمع أغنيه .. أتشات ..
لكن ما مدي صلاحية هذا الاختراع في المصالح الحكوميه !! الله أعلم ..
ليه بقا !! لأننا مش هنعرف نشوف شغلنا ..
 أمال هنقلب المواطن ازاي من غير ما نشوفوا !!
لازم يأنسنا و يشخلل جيوبه ..
لازم يطلع عينه .. أمال يحس بقيمة الورقه دي ازاي .. 

بقينا في 2012 .. ولسه بنعتمد الروتين ..
كعب داير .. عقاب بدون جريمه ..

بلد حضاراتها 7000 سنه .. لسه بتستخدم الطرق البدائيه في معاملاتها ..
مع ان أحنا جمبنا دول بدو .. وبيدفعوا فاتوره التليفون بالتليفون ..
علمنا كل الناس ومش عارفين نتعلم من حد ..
كل اللي أنا طلباه .. أني مكرهش اليوم اللي أروح أطلع فيه ورقه ..
عشان بحب بلدي عيزاها تطور .. عايزه ورقي في كمبيوتر .. بس ..  

أنا جاي أمضي و ماشي ..

كل واحد يسأل نفسه سؤال ..
ممكن تشتغل ويطلع عينك  من غير ما تاخد مرتب !!
أكيد لأ .. مستحيل ..
طب ازاي انت ترضى تأخد مرتب من غير ما تشتغل !!
لو دخلت  أي مصلحه حكوميه أو أي مدرسه .. هتلاقي ناس عاديين جداً قاعدين ..  طبيعي جداً مش بيشتغلوا ..
ده اذا لقيت ناس اصلاً .. مش واحد مستأذن والتاني مزوغ و التالت مجاش أصلاً ..
ولو اشتغلوا يبقى بوز شبرين .. متضررين ..
طيب انت وراك ايه تاني تعمله !! أنت سعاتها هتبقي عايش ليه !!
علاوة علي ده كله .. أنك بتاخد فلوس متعبتش فيها خاااالص .. يعني سحت وحرام ..
بتاكل حراااام وبتشرب حراااام وبتأكل ولادك حراااام ..
وأنتي لو أم .. المتوقع مع كل ده تربي ولادك علي الصح ازاي وأنتي مش بتعملي الصح !
هما بيشفوكي مش بتشغلي ومع ذلك بتجيبي فلوس  .. هيعملوا عكس كده ازاي !
ليه الناس مستهونه بالموضوع كده !! ..
والله مش سهل ابداً .. لو معاك ملايين ومفيش بركه ملهمش لزمه ..
ليه كده مش عايزين نقرب من ربنا .. دي بركه ربنا من المعجزات ..
ومع ذلك اللي يزعل .. ان بلاقي اعتصامات و احتجاجات عشان زياده المرتبات ..
ما هي دي الفكره .. الأسعار غليت عشان الموارد نقصت عشان مفيش ناس بتشتغل .. مش هيبقي في بركه !!

يا ريت تقعد مع نفسك .. تصحح حياتك .. تصحح نفسك ..
أفعالنا اللي بتحدد مستقبلنا ..
قال الله تعالى " ان الله لا يغير بقوم حتي يغيروا ما بأنفسهم " ..

أنا مش بعمم .. فيه ناس شايفه شغلها .. وفي ناس لأ ..
أنا كتبت الكلام ده عشان بحب بلدي وأهل بلدي ..
ونفسي فعلاً نكون أحسن ناس مش بس كلام ..

هتستفيد ايه لما تشتم !!

اكيد دلوقتي مفيش حد معندوش Account علي " Facebook" او "Twitter" ..
لما بشوف Post غريب علي Facebook او حتي Video علي ال You Tube ..
ببقا مهتمه اوي اشوف رأي الناس او بالأصح " Comments " اللي بتبقا صدمه بالنسبالي
لما بيبقا الموضوع عن واحده متصوره صوره مش كويسه أو حتي واحد .
لما بتبقي مسأله دينيه  .
أو حتي في عالم الشهره لما تبقي مغنيه او ممثله مزوداها حبتين أو حتي ممثل أو شخصيه عامه .
بلاقي سيل من الشتائم اللي محدش يتحملها في العرض والشرف .. شتائم تعدت مرحلة البذائه بكتييييييييييييير .
طب ليه كل ده !!
ليه تحمل نفسك ذنوب ..
ليه تحط نفسك في اطار البني ادم الهمجي اللي بيعبر عن نفسه بالهجوم الغير مبرر مش بس علي الشخص نفسه
ده علي عرضه وشرفه ..
ابسط حاجه لما أشوف واحده حاطه صوره لنفسها مش كويسه أو ممثله عملت فيلم مش كويس أو طلع منها تصرف
غير لائق .. قول "ربنا يهديها " " ربنا يتوب عليها " .. الدعوه دي بتستجاب ممكن عشان حد واحد بس دعالها او دعاله
ربنا يصلح الحال ..
ومش معني انك مش متفق مع حد في الرأي أو حد غلط يبقا تشتمه او تتهمه بالجهل أو اي حاجه تانيه .. 

احنا بني ادمين .. طبيعي بنغلط .. غلطه كبيره أو صغيره ..
ممكن أتكلم مع بني أدم عنيد وممكن طريقتي انا في الكلام معاه ومحاوه فرض الرأي عليه هي اللي بتخليه عنيد ..
المهم الكلمه الطيبه .. النصيحه .. النقاش .. الهدوء .. التفاهم يا تقنعني يا اقنعك ..

كما قال الله تعالي .. " ادعوا الي سبيل ربك بالحكمة والموعظة الحسنه وجادلهم بالتي هي احسن " . 
وكما قال الرسول عليه الصلاة والسلام .. " الكلمه الطيبه صدقه " 

انتقد وقول رأيك بس من غير تجريح في حد .. العرض و الشرف مش لعبه ولا كلمه تقولها وخلاص ..
قال الله تعالى .. "   (إن الذين يرمون المحصنات الغافلات المؤمنات لعنوا في الدنيا والآخرة ولهم عذاب عظيم) " 
يا رب تكون رسالتي وصلت ..